الثلاثاء , 24 أكتوبر 2017
جديد الموقع
واملا الحياه
واملا الحياه

واملا الحياه

واملا الحياة زرع أخضر وحَبّ طالع يصبّح
وكل ما ح تـدي أكتر الخير في إيدك يسبّح
---
على إيه بتندب وتبكي والرب قادر وعادل
عمال في ربك بتشكي وانته اللي خايب وفاشل
---
يا ولدي عايزك تكون راجل على قد قولك
ولابــد حتمًا تكون نسجك على قد نولك
---
يا ولدي عايزك تدوم راجل تقدّر وتفهـم
ما تتوهشي وسط الهموم وتقضّى عمرك بتحلم
---
وإن عُزت مرة تصاحب إحذر من ابن الأباعد
دا الصاحب الحق ساحب وإيد على إيد تساعد
---
كان ليّه صاحب ماشيته وكان مطاوع ويسمع
وفي لحظة واحده التقيته كأنه بالون وفرقــع
---
بتبص ليه عند غيرك عمّال تبعتر في حقدك
ما تكفّي شرك بخيرك وتداري خيبتك لوحدك
---
فيه ناس كسولة وبليده وعايزه تاكل اللي باعمل
على ناس غبيّة وعنيده لا معونة.. ولا حتى تعمل
---
خليك خفيف طول حياتك لكن بأفكار تقيلــة
تعيش.. ويبقى مماتـك حياة… مفيدة وجميلة
---
على إيه بتحقد عليّه وتغلّ دايمًا في نفسـك
وكأن رزقي بإديّه وكأن حظي اللي ناحسك
---
الدنيــا دار الضيافة إوعاك تكون فيها كُبّه
خليك في عمرك إضافة وزيد حياتك محبّــة
---
خليك في عمرك إجابه وعزم جنب اللي حاير
فيه ناس بتنضح كآبه وزرعها زرع بايـر

شعـــر
د. محمود خليل

Print Friendly

اضف رد

لن يتم نشر البريد الإلكتروني . الحقول المطلوبة مشار لها بـ *

*